Sunday, June 24, 2007

اجوبة سهلة لأسئلة صعبة




آش بيهم التلامذة مستواهم زيرو؟ على خاطر ما يحبوش يقروا
آش بيهم الطلبة ما ينجحوش؟ بهايم ماهمش متاع قراية
آش بيهم الولاد ديما يتبولدو عل البنات؟ قعار او ماهمشي متربيين
شبيه الشباب انهار الكل قاعد في القهاوي؟ يموتوا عل الركشة او ما يحبوش يخدموا
علاش كثر الفساد و الهمجية؟ جيل ما هوش متربي؛ يا حسرة احنا قبل ما كناش هكة
شبيه ما ثماش ديمقراطية؟ شعب متخلف لازمتو كان العصى
علاش تكتب كان بالفرنسية؟ ماعنديش كلافي عربي
علاش ما ثماش ريزو؟ على خاطر العرب الكل اتحب تتكلم في وقت واحد
علاش ما تعطونيش قرض؟ على خاطرك ما تخدمش او ما عندكشي ضمان
علاش ثما برشة حوادث؟ يسوقوا او هما سكارى اللطف
علاش كثرت ظاهرة الانتحار في البلاد؟ ما عادش ثمة ايمان بربي
علاش لازم ندفع رشوة؟ باش تسلك امورك يامستك
علاش لازمك افخاذ باش تنجح او اكتاف باش تخدم و عين صحيحة باش مايعديوهاش عليك؟على خاطر الدنيا صعبت
علاش السارق انسموه مهف و الحقاني دغف؟ و علاش و علاش...؟؟؟
واخيرا و ليس آخرا-هكة ديما يقولوا في التلفزة- علاش انا نسأل في هاالاسئلة هذي الكل؟ على خاطر السؤال هو بداية التفلفس؛ هكا قالنا استاذ الفلفسة في الباك الله يذكر بالخير؛ الغريب و اللي ما لقيتلوش جواب؛ علاش كي احنا عندنا الاجوبة الكل؛ علاش حالنا مكرب هكة؟ يظهرلي
هذا هاك اللي يسموه علم الغيب؛ و الغيب لا يعلمه الا الله. و السلام عليكم و رحمة الله و بركاته

No comments: